O Colexio Oficial de Arquitectos de Galicia créase no ano
1973, por segregación do antigo Colexio de León, Asturias e Galicia (Decreto de
2 de maio de 1973). A Asamblea constitutiva ten lugar en Santiago no mes de
outubro do mesmo ano. Desde entón o COAG desenrolou unha labor na que se
combinan a atención ós aspectos profesionais e de servicio ó colexiado, coa
incidencia na problemática de Galicia en aspectos culturais, sociais,
económicos e de planeamento, procurando sempre a colaboración e participación
nas esferas político-administrativas, docentes e culturais.
A súa estructura organizativa aséntase en dous escalóns, o
xeral, cos órganos centrais na Sede colexial de Santiago, e o territorial, coas
Delegacións de A Coruña, Lugo, Ourense, Pontevedra, Vigo, Santiago e Ferrol.
A xestión directiva do COAG corresponde á Xunta de Goberno
e ó seu Decano-Presidente. As Delegacións están rexidas por unha Xunta
Directiva.
Sectorialmente funcionan no COAG dúas agrupacións
profesionais, a Agrupación de Arquitectos Peritos e Forenses e a Agrupación de
Arquitectos ó Servicio das Administracións Públicas en Galicia.
Para auxiliar á Xunta de Goberno nos seus cometidos existen
tres Comisións colexiais: de Planeamento e Medio Abiente, de Asesoramento
Tecnolóxico e de Cultura.
Ademáis dos servicios obrigatorios que lle corresponden
como Colexio Profesional, o COAG ofrece, entre outros, os seguintes:
información xeral e periódica a través das Circulares, edición de libros e da
revista Obradoiro, arquivo histórico, exposicións, asesoramento xurídico e
tecnolóxico, cursos, premios e becas.
Desde a súa creación os Decanos-Presidentes foron os
seguintes: Andrés Fernández-Albalat Lois (1973-1977); Xosé Bar Boo (1977-1979);
Juan González Cebrián (1979-1981); Xabier Suances Pereiro (1981-1983); Miguel
Silva Suárez (1983-1986); Arturo Conde Aldemira (1986-1989); José Manuel Rey
Pichel (1989-2003); Teresa Tabóas Veleiro (2003-2005); sendo o Decano actual
Celestino García Braña.