Regulamento
Aprobado por acordo da Xunta de Goberno nº 14/2012 de 5 de novembro, así como
tamén o nomeamento do vocal encargado do mesmo, segundo establece o seu artigo
3.
REGULAMENTO DO SERVIZO DE DEONTOLOXÍA DO COLEXIO OFICIAL DE ARQUITECTOS DE
GALICIA
PREÁMBULO
Entre os fins esenciais do Colexio Oficial de Arquitectos de Galicia,
recollidos no artigo 5, apartados b) e c) dos estatutos colexiais, están o de
ordenar o exercicio profesional no marco das Leis e velar pola observancia da
deontoloxía no exercicio da profesión e o respecto debido aos dereitos dos
cidadáns. Para a consecución dos seus fins o Colexio exercerá, segundo dispón o
artigo 6 dos seus estatutos, entre outras, funcións de ordenación como evitar o
intrusismo profesional, velar pola ética e a dignidade da profesión, tanto nas
relacións recíprocas entre Arquitectos, coma nas destes cos seus clientes así
como exercer a potestade disciplinaria sobre os Arquitectos que incumpran os
seus deberes colexiais ou profesionais, tanto legais coma deontolóxicos.
Así mesmo e en virtude das últimas modificacións lexislativas que regulan a
actividade dos Colexios Profesionais en aplicación da Directiva Comunitaria de
liberalización do sector servizos, tamén é obriga dos Colexios Profesionais
resolver as queixas e reclamacións referidas á actividade colexial ou
profesional dos seus colexiados, tanto se se presentan por calquera consumidor
ou usuario que contrate os servizos profesionais dun arquitecto, ou a través de
asociacións e organizacións de consumidores e usuarios en representación ou
defensa dos intereses destes, instruíndo, cando proceda, polos órganos colexiais
competentes, os oportunos expedientes informativos ou disciplinarios.
Para apoiar e asistir o labor do Colexio de Arquitectos nestes fins e
funcións, a Xunta de Goberno considerou conveniente o establecemento e puxo en
marcha do SERVIZO DE DEONTOLOXÍA no seu ámbito de actuación, cuxo funcionamento
se rexerán polo regulamento que se desenvolve a continuación.
REGULAMENTO DO SERVIZO DE DEONTOLOXÍA
Artigo 1. Definición
Co obxecto de apoiar e asistir aos órganos competentes do Colexio nos seus
fins de ordenar o correcto exercicio da profesión de arquitecto dentro do marco
da Leis, así como o de velar pola observancia da deontoloxía no exercicio da
profesión e o respecto debido aos dereitos dos cidadáns e dos arquitectos, se
crea o Servizo de Deontoloxía do Colexio Oficial de Arquitectos de Galicia, cuxo
funcionamento se axustará ao disposto neste regulamento, nos estatutos colexiais
e nas disposicións legais vixentes referidas a ese ámbito.
Artigo 2. Ámbito de actuación
O Servizo de Deontoloxía exercerá as súas funcións no ámbito de aplicación
das normas deontolóxicas vixentes, entre outros, nos campos que se concretan a
continuación:
- Nas formas de exercer a profesión polo arquitecto.
- Nas obrigas xerais do arquitecto.
- Nas súas incompatibilidades.
- Nas relacións do arquitecto cos clientes.
- Nas relacións do arquitecto cos contratistas e industriais.
- Nas relacións do arquitecto con outros profesionais que actúen como
conselleiros técnicos ou como colaboradores.
- Nas relacións entre arquitectos.
- Nas relacións do arquitecto co Colexio.
Artigo 3. Organización
O servizo estará coordinado por un representante da Xunta de Goberno e
integrado por aqueles colaboradores e servizos técnicos e administrativos da
estrutura colexial que se consideren necesarios en cada momento para o seu bo
funcionamento.
Artigo 4. Funcións do servizo.
Serán funcións do servizo as seguintes:
A) Relativas á tramitación de queixas e reclamacións referidas á
actividade colexial ou profesional dos colexiados presentadas por estes ou por
consumidores ou usuarios que contratasen os seus servizos profesionais, así como
por asociacións e organizacións de consumidores e usuarios na súa representación
ou en defensa dos seus intereses así como á tramitación de denuncias formuladas
en materia disciplinaria:
- Atender e informar acerca de todas aquelas queixas, reclamacións ou
denuncias, que se reciban no propio servizo ou en calquera outro do Colexio
relativas á actuación colexial ou profesional dos arquitectos adscritos, ao
Colexio de Galicia, propoñendo a súa resolución en primeira instancia nun
dos sentidos seguintes:
- remitindo o expediente aos órganos colexiais competentes, acompañado
da correspondente proposta motivada, para instruír o oportuno expediente
informativo ou disciplinario.
- propoñendo motivadamente aos órganos colexiais competentes o seu
arquivo no que respecta á improcedencia de inicio de expediente
disciplinario.
B) Relativas á tramitación de expedientes disciplinarios:
- Prestar a súa colaboración e asistencia técnica aos órganos colexiais
competentes no trámite de información previa ou reservada nos termos que se
lle indiquen, así como ao instrutor, se é o caso, designado para a
tramitación dos expedientes disciplinarios.
- Seguimento dos expedientes disciplinarios que se tramiten ao obxecto de
supervisar e velar polo cumprimento dos trámites e prazos establecidos en
xeral, e en particular, na tramitación destes.
- Calquera outro labor de apoio e asistencia na tramitación dos
expedientes nos termos que lle encomende a Xunta de Goberno no ámbito de
actuación deste servizo.
C) Relativas a estudo e informe:
- Realizar os informes e estudos xerais ou específicos que lle encomende a
Xunta de Goberno dentro do ámbito de actuación do servizo.
- Propoñer a realización de todas aquelas tarefas que se consideren
necesarias ou convenientes para identificar a existencia de problemas en
materia deontolóxica, de intrusismo profesional ou competencial desleal.
- Propoñer á Xunta de Goberno actuacións colexiais para cumprir e facer
cumprir o Regulamento Deontolóxico Profesional, para evitar o intrusismo
profesional, ou a competencia desleal.
- Informar a Xunta de Goberno, directamente ou a través do representante
designado para o efecto, como mínimo unha vez cada trimestre, sobre a marcha
do servizo, con independencia de que en asuntos particulares se poida
solicitar información sobre a situación ou estado dun determinado
expediente.
Artigo 5. Tramitación das queixas, reclamacións ou denuncias de
colexiados e terceiros
- O Servizo de Deontoloxía encargarase da tramitación das queixas,
reclamacións ou denuncias que se presenten nos termos que se determinan a
continuación.
- Só se tramitarán aquelas queixas, reclamacións ou denuncias relativas a
Arquitectos adscritos ao Colexio Oficial de Arquitectos de Galicia e que
conteñan polo menos a seguinte información: identificación e firma
(manuscrita ou dixital) da persoa solicitante, referencia da cuestión ou dos
feitos obxecto de queixa, reclamación ou denuncia, e, cando proceda,
pretensións ou obxecto da solicitude.
- Poderán utilizar o Servizo de Deontoloxía colexial:
- Os arquitectos adscritos ao Colexio Oficial de Arquitectos de
Galicia.
- Os clientes e usuarios dos servizos dos arquitectos adscritos ao
Colexio Oficial de Arquitectos de Galicia.
- Calquera persoa física ou xurídica que denuncie fundadamente a
actuación dun arquitecto pertencente á organización colexial, por
entender que vulnera a deontoloxía profesional e que teña un interese
lexítimo no asunto.
- Toda queixa, reclamación ou denuncia terá un rexistro de identificación
que permita o seu seguimento para os efectos de tramitación, xestión de
documentación e resolución.
- De todo escrito ou solicitude do que se deriven manifestacións
"negativas" para un Arquitecto informarase inmediatamente este,
concedéndolle un prazo de dez días para que poida formular as explicacións
ou realizar os comentarios que estime necesario.
- Dende o servizo poderase solicitar das partes a información que se
considere necesaria para alcanzar o máis completo coñecemento do asunto así
como aceptar a práctica dalgún medio de proba por solicitude de parte
interesada.
- No prazo máximo de dous meses dende a recepción de toda a información e
documentación requirida ás partes, emitirase un informe e proposta de
resolución co contido previsto no artigo 4.A)1 deste regulamento, segundo
proceda, que será remitida á Xunta de Goberno para a súa resolución.
- As resolucións da Xunta de Goberno serán notificadas ás partes. Se a
resolución da Xunta de Goberno se dita no sentido de entender que existen
indicios abondo que motiven o inicio de dilixencias previas ou dun
expediente disciplinario, procederase conforme ao procedemento previsto nos
estatutos colexiais, normativa do Consello Superior dos Colexios de
Arquitectos de España e demais que lle sexa de aplicación.
- Todas as resolucións adoptadas pola Xunta de Goberno, así como toda a
documentación asociada, serán recollidas nun expediente que se manterá
actualizado.
Artigo 6. Confidencialidade
Todos os aspectos de confidencialidade e acceso á información de carácter
persoal ou profesional privados a que se teña acceso por persoal da organización
colexial no desenvolvemento destas tarefas queda suxeito ás condicións de
confidencialidade e protección de datos que, con carácter xeral, afectan a toda
a organización colexial e que se poden consultar nos correspondentes
regulamentos.
Artigo 7. Información e atención ao público.
O Servizo de Deontoloxía Colexial axustarase ao disposto na lexislación
vixente.