COAG Santiago

A exposición, titulada B96 en referencia ao código co que se iniciaron os expedientes de rehabilitación de locais en 1996, conta coa edición dun libro-catálogo no que os protagonistas e responsables do proxecto analizan o desenvolvemento e a influencia que este programa supuxo para a conservación da cidade histórica.

O libro recolle as fotografías da exposición nas que se pode admirar o traballo realizado a través do antes e despois das obras de rehabilitación en lugares como lencerías, bares, tabernas, restaurantes, tendas de deporte, sombrererías, perruquerías, reloxerías, farmacias e históricas queserías de venda, entre outros. A actuación na Praza de Abastos conta cun apartado especial dadas as características da rehabilitación dos seus locais.

Revitalización do tecido urbano

O comisario da exposición, Pablo Tomé, arquitecto do Consorcio de Santiago e responsable deste programa, é o artífice xunto cos arquitectos da Oficina Técnica da remodelación de máis de douscentos establecementos dedicados a tendas e locais profesionais, hostalaría ou galerías de arte, entre outros. Un labor que ten contribuído a manter o espírito de cada espazo e preservalo coas peculiaridades arquitectónicas e urbanísticas que o diferencian, á vez que fai de Santiago unha das cidades máis atractivas da humanidade.

A exposición amosa que a recuperación e posta ao día dos comercios do casco histórico que se acolleron ao programa foron obxecto fundamental e prioritario na revitalización do tecido urbano, xa que a potenciación e o desenvolvemento da actividade económica teñen a mesma importancia que a residencial.

A mostra permanecerá aberta na Casa da Conga desde o próximo luns, 15 de setembro, ata o próximo 16 de outubro, en horario de 11:30 a 13:30 e de 19:00 a 21:00 horas.